ஐஸ்வர்யாராய் மகள் உடல்நிலை குறித்த சர்ச்சைக்குரிய வீடியோ – கூகுள் நிறுவனத்திற்கு டெல்லி உயர்நீதிமன்றம் அதிரடி உத்தரவு

ஏப்ரல்.21

நடிகை ஐஸ்வர்யா ராய் மகள் ஆராத்யா உடல்நிலை தொடர்பான ஆட்சேபனைக்குரிய வீடியோ பதிவை நீக்கும்படி ‘கூகுள்’ நிறுவனத்திற்கு டெல்லி உயர் நீதிமன்றம் உத்தரவிட்டுள்ளது.

பிரபல பாலிவுட் நட்சத்திரங்களான அபிஷேக் பச்சன் – ஐஸ்வர்யா ராய் தம்பதியரின் 11 வயது பெண் குழந்தையான ஆராத்யா பச்சன், அரிய வகை நோயால் பாதிக்கப்பட்டு, உயிருக்கு போராடி வருவதாக யு-டியூப்பில் சிலர் வீடியோக்களை பதிவேற்றம் செய்தனர். இதை எதிர்த்து, ஆராத்யா, அவரது தந்தை அபிஷேக் சார்பில், டெல்லி உயர் நீதிமன்றத்தில் வழக்கு தொடரப்பட்டது.

இந்த வழக்கை விசாரித்த நீதிபதி, ஆராத்யா பச்சன் உடல்நலம் குறித்த வீடியோக்களை யூ-டியூப்பிலிருந்து உடனடியாக நீக்க வேண்டுமென கூகுள் நிறுவனத்திற்கு உத்தரவிட்டார். மேலும், ஒரு குழந்தையின் மனம் மற்றும் உடல் ஆரோக்கியம் குறித்து தவறான தகவல்களை பரப்புவது முற்றிலும் ஏற்றுக்கொள்ள முடியாதது என்றும் டெல்லி உயர்நீதிமன்றம் கண்டனம் தெரிவித்துள்ளது.