ஆகஸ்டு,02-
காதலை சுவையாக சொல்லி இருந்த படம் மின்னலே’.
இந்தப்படத்தின் மூலம் தான் கவுதம் வாசுதேவ் மேனன் சினிமாவுக்கு அறிமுகம் ஆனார். அவர் இயக்கத்தில் 2003- ஆண்டு ஆகஸ்ட் மாதம் வெளியான படம் காக்க காக்க.
கவுதமுக்கு இது இரண்டாம் படம். வி கிரியேஷன்ஸ் சார்பில் எஸ்.தாணு தயாரித்திருந்தார்.
இந்தப் படத்தில் சூர்யா, ஜோதிகா, ஜீவன், டேனியல் பாலாஜி ஆகியோர் நடித்திருந்தனர். ஹாரிஸ் ஜெயராஜ் இசை அமைத்திருந்தார். அனைத்து பாடல்களையும் பாடலாசிரியர் தாமரை எழுதி இருந்தார்..
வித்தியாசமான கதைக் களம் ரசிகர்களை ஈர்த்தது. தமிழ் சினிமாவில் மாறுபட்ட முறையில் போலீஸ் கதையை சொல்லிய படம். விமர்சன ரீதியாகவும், வசூல் ரீதியாகவும் சூர்யாவுக்கு மிக முக்கியமான படம் இது.
இந்த படம் குறித்த தனது நினைவுகளை சூர்யா பகிர்ந்துள்ளார்.
“எனக்கு அனைத்தும் கொடுத்த படம் இது. அன்புச்செல்வன் கதாபத்திரம் என் மனதுக்கு நெருக்கமான ஒன்று. ஜோதிகா தான் இந்தப் படம் குறித்து என்னிடம் முதலில் பேசி இருந்தார். இயக்குநர் கவுதம் வாசுதேவ் மேனன், சக நடிகர்கள் மற்றும் உடன் பணியாற்றிய சக தொழில்நுட்ப கலைஞர்களுக்கு நன்றி. நல்ல பல நினைவுகள் இதில் உள்ளன” என சூர்யா ட்வீட் செய்துள்ளார்.
காக்க காக்க படப்பிடிப்பின் போது எடுக்கப்பட்ட படங்களையும் சூர்யா பகிர்ந்துள்ளார்.
படம் வெளியாகி 20 ஆண்டுகள் நிறைவானதை அடுத்த மீண்டும் திரையரங்குகளில் வெளியிடும் திட்டத்தோடு பழைய செய்திகளை வெளியிடுகிறார்களோ ?
000