டிசம்பர்-27.
ரஜினி, கமல், விஜய் என தமிழ் சினிமாவின் உச்சநட்சத்திரங்களுடன் பயணித்தவர் ஷங்கர், சந்தை மதிப்பில்லாத அர்ஜுனை வைத்து இரண்டு சூப்பர் ஹிட் படங்கள் கொடுத்தார். ‘இந்தியன் -2 ‘படத்தின் படுதோல்வியால்,அவர் துவண்டு போயிருக்கிறார்.
ஜெண்டில் மேன், காதலன், இந்தியன், ஜீன்ஸ்,முதல்வன் என தொடர்ச்சியாக வெற்றி படங்களை கொடுத்த அவர் , முதன் முதலாக ‘பாய்ஸ்’ படத்தில் சறுக்கினார். புதுமுகங்களை வைத்து அவர் இயக்கிய அந்தப்படம், வசூலில் பெரிதாக குறை வைக்கவில்லை. ஆனால் ஊடகங்கள் படத்தை மோசமாக விமர்சித்தன.
எனினும் அடுத்த படமான ‘அந்நியன் ‘படத்தில் ஷங்கர் விசுவரூபம் எடுத்தார். அதன் பிறகு அவர் எடுத்ததெல்லாம் பெரும் வெற்றி பெற்றன. சிவாஜி, எந்திரன், 2.0 என ரஜினிக்கு மூன்று சூப்பர் ஹிட் படங்களை கொடுத்தார்.
‘பாய்ஸ்’படத்துக்கு பிறகு ஷங்கருக்கு கிடைத்த மிகப்பெரிய தோல்வி-‘இந்தியன் -2’.இதனை அவர் எதிர்பார்க்கவில்லை. இந்தப்படம் வளருவதற்கு பல ஆண்டுகள் பிடித்தன. நிறைய சோதனைகளையும் ஷங்கர் எதிர்கொண்டார்.ஆனாலும் படம் போகாததால் அவர் அப்செட்.
இப்போது,அவர் பெரிதும் நம்பிக்கை வைத்துள்ள படம்,’கேம் சேஞ்சர்’
இந்தப்படத்தில் ராம் சரண் இரட்டை வேடத்தில் நடித்துள்ளார், இவருடன் கியாரா அத்வானி, அஞ்சலி, எஸ்.ஜே.சூர்யா, ஸ்ரீகாந்த், சுனில், சமுத்திரக்கனி மற்றும் ஜெயராம் போன்ற முன்னணி நடிகர்கள் நடித்துள்ளனர்.
கேம் சேஞ்சர் ஜனவரி 10 – ஆம் தேதி வெளியாகிறது. தெலுங்கு, தமிழ், இந்தி உள்ளிட்ட மொழிகளில் ‘பான் இந்தியா ‘படமாக ரிலீஸ் ஆகிறது.
இந்த படம் தனக்கு ‘அக்னி பரீட்சை’என நட்பு வட்டாரத்தில் ஷங்கர் பகிர்ந்து உள்ளார்.
கேம் சேஞ்சர் அவருக்கு ‘சேஞ்ச்’ ஆக இருக்குமா? பொறுத்திருந்து பார்ப்போம்.
*