ஜுலை, 11-
இந்தியாவின் நட்சத்திர கிரிக்கெட் வீரரான மகேந்திரா சிங் டோனியும், அவரது மனைவி சாக்ஷி சிங் டோனியும் இணைந்து ‘தோனி எண்டர்டெயின்மெண்ட்’ என்ற திரைப்பட தயாரிப்பு நிறுவனத்தை தொடங்கியுள்ளனர்.
இந்த நிறுவனத்தின் தயாரிப்பில் உருவாகி உள்ள தமிழ் திரைப்படம் ’லெட்ஸ் கெட் மேரிட்’( (Lets Get Married) . சுருக்கமாக- ‘எல்.ஜி.எம்’. காதலை மைய இழையாக கொண்டு தயாராகி இருக்கும் இந்த படத்தை ரமேஷ் தமிழ்மணி இயக்கியுள்ளார். ஹரிஷ் கல்யாண், இவானா, நதியா ,நகைச்சுவை நடிகர் யோகி பாபு உள்ளிட்டோர் நடித்துள்ளனர்.
‘எல்.ஜி.எம்’ படத்தின் போஸ்டர்கள், டீசர் மற்றும் பாடல்கள் சமீபத்தில் வெளியாகி ரசிகர்களின் கவனம் பெற்ற நிலையில் , இதன் இசை மற்றும் டிரைலர் வெளியீட்டு விழா சென்னையில் நடந்தது. இந்த நிகழ்ச்சியில் டோனி, அவரது மனைவி சாக்ஷி சிங் டோனி, ஹரிஷ் கல்யாண், யுவனா, யோகி பாபு மற்றும் படக்குழுவினர் கலந்து கொண்டனர். இந்த நிகழ்ச்சியில் நடிகர் யோகிபாபு பேசியதாவது:
‘’ லெட்ஸ் கெட் மேரிட் திரைப்படத்தில் நடிப்பதற்கு வாய்ப்பளித்ததற்கு நன்றி. இயக்குனர் ரமேஷ் தமிழ் மணி இந்த படத்தில் நடிப்பதற்காக என்னிடம் ஹால்ஷீட் கேட்டிருந்தார். தேதிகள் இல்லாததால் நான் யோசித்துக் கொண்டிருந்தேன். எனது தயக்கத்தை புரிந்து கொண்ட ரமேஷ் தமிழ்மணி, டோனி சாரிடம் இருந்து பேட் வாங்கி தருவதாக் கூறினார். டோனி சாரின் பேட்டுக்காக எல்ஜிஎம் நடிக்க ஒத்துக் கொண்டேன் ’’
படத்தின் கதை என்ன?
படத்தின் கதையை வெளிப்படுத்தும் வகையில் இதன் ட்ரெய்லர் உள்ளது. ஜாலியான காதல், இதன் தொடர்ச்சியாக நடக்க இருக்கும் திருமணம்., திருமண பந்தத்தில் மாமியரை புரிந்துகொள்ள மருமகள் ஏற்பாடு செய்யும் பயணம், அதில் நடக்கும் சுவையான சம்பவங்கள் என ட்ரெய்லர் அனைவரையும் கவர்ந்திழுக்கிறது.விரைவில் படம் திரையரங்குகளில் வெளியாக உள்ளது.
கிரிக்கெட்டில் வெற்றிக் கொடி நாட்டிய டோனி திரைப்பட தயாரிப்பிலும் அந்தக் கொடியை பறக்க விட தமிழ் ரசிகர்கள் ஆதரவு தரவேண்டும்.
00